एमसीएफ राज्य कॅरम स्पर्धा प्राजक्ता नारायणकर व महम्मद घुफ्रान राज्य विजेते!

एमसीएफ राज्य कॅरम स्पर्धा

प्राजक्ता नारायणकर व महम्मद घुफ्रान राज्य विजेते!

 

मुंबई : मंडपेश्वर सिव्हिक फेडरेशन, बोरिवली यांच्या वतीने आणि रोटरी क्लब ऑफ बोरिवली यांच्या सहकार्याने आयोजित १०व्या एमसीएफ महाराष्ट्र राज्य मानांकन कॅरम स्पर्धा अतिशय रोमांचक ठरली.

स्पर्धेच्या अंतिम दिवशी महिला गटात प्राजक्ता नारायणकर (मुंबई उपनगर) तर पुरुष गटात महम्मद घुफ्रान (मुंबई) यांनी आपल्या उत्कृष्ट खेळाने राज्य विजेतेपदावर नाव कोरले.

 

महिला एकेरी : प्राजक्ताचा ऐतिहासिक विजय

मुंबई उपनगरच्या प्राजक्ता नारायणकरने आपल्या कारकिर्दीतील पहिले राज्यस्तरीय विजेतेपद पटकावले. अंतिम फेरीत तिने मुंबईच्या अंबिका हरिथला तीन सेटपर्यंत रंगलेल्या लढतीत पराभूत करत रु. ८,००० रोख पारितोषिक व चषक जिंकला.

 

उपांत्य फेरीत: प्राजक्ताने मिताली पाठक (मुंबई) हिचा पराभव केला होता.

अंबिकाने श्रुती सोनावणे (पालघर) हिला सरळ सेटमध्ये हरवून अंतिम फेरी गाठली होती.

 

तिसरा क्रमांक: मिताली पाठक हिने श्रुतीवर मात करून मिळवला.

 

पुरुष एकेरी : घुफ्रानचा संयमी खेळ, रु. २५,००० ची कमाई

मुंबईच्या महम्मद घुफ्रानने अंतिम फेरीत ठाण्याच्या पंकज पवारवर तीन सेटमध्ये मात करत विजेतेपदासह रु. २५,००० चे पारितोषिक पटकावले.
पंकजने पहिला सेट सहज जिंकला होता, पण घुफ्रानने संयम राखत पुढील दोन सेटमध्ये वर्चस्व गाजवले.

 

उपांत्य फेरीत: घुफ्रानने सागर वाघमारे (पुणे) ह्याला, तर पंकजने प्रफुल मोरे (मुंबई) याला हरवले.

 

तिसरा क्रमांक: सागर वाघमारेने प्रफुल मोरेवर मात करून मिळवला.

 

प्रमुख उपस्थिती व गौरव समारंभ:

विजेत्या खेळाडूंना एमसीएफचे मानद अध्यक्ष सी.ए. निहार जांबुसराइया, मानद सचिव अॅड. सतिश शर्मा, उपाध्यक्ष डॉ. चंद्रकांत लालन, माजी अध्यक्ष हरीश छेडा, कार्यकारिणी सदस्य हेमल शहा व महाराष्ट्र कॅरम असोसिएशनचे मानद सचिव अरुण केदार यांच्या हस्ते चषक, प्रमाणपत्रे व रोख रक्कम देऊन गौरविण्यात आले.

कार्यक्रमाचे सुत्रसंचालन महर्षी देसाई यांनी केले.

 

स्पर्धेतील हायलाईट्स व थेट सामन्यांचे पुनःप्रक्षेपण महाराष्ट्र कॅरम असोसिएशनच्या युट्युब चॅनलवर पाहता येणार आहे.