४३ वी कुमार व मुली राष्ट्रीय अजिंक्यपद खो-खो स्पर्धा महाराष्ट्राच्या दोन्ही संघांची विजयी सलामी

 

४३ वी कुमार व मुली राष्ट्रीय अजिंक्यपद खो-खो स्पर्धा

महाराष्ट्राच्या दोन्ही संघांची विजयी सलामी

अलिगड, दि. २५ नोव्हेंबर: ४३व्या कुमार व मुली राष्ट्रीय अजिंक्यपद खो-खो स्पर्धेच्या सलामीच्या सामन्यात महाराष्ट्राच्या दोन्ही संघांनी विजयाने दमदार सुरुवात केली. उत्तर प्रदेशातील अलिगड येथील महाराणी अहिल्याबाई होळकर स्पोर्ट्स स्टेडियमवर सोमवारी या स्पर्धेला सुरुवात झाली. कुमार व मुली गटांमध्ये प्रत्येकी ३० संघांचा सहभाग आहे.

 

महाराष्ट्र मुलांची विजयी सुरवात

सलामीच्या सामन्यात महाराष्ट्र मुलांच्या संघाने विदर्भावर ३७-२६ असा ११ गुण आणि ५ मिनिटे राखून दणदणीत विजय मिळविला. या सामन्यात महाराष्ट्र संघाने उत्कृष्ट समन्वय आणि अचूक आक्रमणाने आपली ताकद दाखवली. मुलांच्या सामन्यात महाराष्ट्र संघाकडून विलास वळवीने २.४० मी. व १.३० मी. संरक्षण आणि आक्रमणामध्ये ४ गुण मिळवले. भरतसिंग वसावेने १.३० मिनिट संरक्षण करताना आक्रमणामध्ये २ गुणांची कमाई केली. कृष्णा बनसोडेने २.५९ मी. संरक्षण केले. आशिष गौतमने नाबाद २.१० आणि १.२० संरक्षण करताना आपल्या धारदार आक्रमणात ८ गुण टिपले. विदर्भ संघाकडून मोहित नेवरेने १.०० मी. संरक्षण केले. शैलेश कोरेटीने १.०० मी. संरक्षण करताना आक्रमणात ६ गुण मिळवले.

 

मुलींच्या गटात महाराष्ट्राचा दणदणीत विजय

मुलींच्या गटात महाराष्ट्राने मध्य प्रदेशचा ४०-१२ असा एक डाव आणि २८ गुणांनी धुव्वा उडविला.. महाराष्ट्राच्या मुलींच्या संघाने प्रभावी बचाव व आक्रमणाची चमकदार कामगिरी केली. मुलींच्या सामन्यात प्रतीक्षा बिराजदारने ३.३० मी. संरक्षण करून आक्रमणात २ गुण मिळवले. अश्विनी शिंदे हिनेही ३.३० मी. संरक्षण करून ४ गुणांची कमाई केली.  सुषमा चौधरीने ३.२० मी. संरक्षण करून आक्रमणामध्ये ४ गडी बाद केले.  प्रणाली काळेने नाबाद १.१० मी. संरक्षण करून आक्रमणामध्ये १० गुणांची कमाई केली. तन्वी भोसलेने २.४० मी. वेळ नोंदवली. तर मध्यप्रदेश संघाकडून अक्षरा मालिनी आणि लक्ष्मीने प्रत्येकी एक मिनिटे वेळ नोंदवली.

 

इतर सामन्यांचे निकाल:

• मुलांच्या गटात:
• तामिळनाडूने चंदीगडवर एक डाव आणि ३४ गुणांनी विजय मिळवला.
• आंध्र प्रदेशने मध्य भारताचा १६ गुणांनी पराभव केला.
• दिल्लीने हिमाचल प्रदेशवर एक डाव आणि २१ गुणांनी मात केली.
• मुलींच्या गटात:
• ओडिशाने मध्य भारताचा एक डाव आणि २२ गुणांनी पराभव केला.
• राजस्थानने आंध्र प्रदेशवर एक डाव आणि १६ गुणांनी विजय मिळवला.