महाराष्ट्र राज्य खुली बॅडमिंटन स्पर्धा गुरुवारपासून; 940 खेळाडूंचा सहभाग निश्चित!

 

महाराष्ट्र राज्य खुली बॅडमिंटन स्पर्धा गुरुवारपासून;

940 खेळाडूंचा सहभाग निश्चित!

मुंबई, 12 नोव्हेंबर:  ग्रेटर मुंबई बॅडमिंटन असोसिएशन (जीएमबीए) आयोजित योनेक्स सनराइज-महाराष्ट्र राज्य खुली बॅडमिंटन स्पर्धा 14 नोव्हेंबर 2024 पासून सुरू होत आहे. या स्पर्धेत हिस्सा घेण्यासाठी राज्यभरातील 940 खेळाडूंनी आपला सहभाग निश्चित केला आहे.

 

महाराष्ट्र बॅडमिंटन असोसिएशनच्या (एमबीए) मान्यतेने आयोजित होणारी ही स्पर्धा देशातील सर्वात मोठ्या बॅडमिंटन स्पर्धांपैकी एक मानली जात आहे. नॅशनल स्पोर्ट्स क्लब ऑफ इंडिया आणि विलिंग्डन स्पोर्ट्स क्लब यांच्या सहकार्याने ही भव्य स्पर्धा आयोजित केली जात आहे.

 

स्पर्धेचे आकर्षण म्हणजे 11, 13 आणि 15 वर्षांखालील मुला-मुलींच्या एकेरी तसेच 17 वर्षांखालील एकेरी आणि दुहेरी स्पर्धा. तसेच, खुल्या गटात पुरुष आणि महिला एकेरी, दुहेरी आणि मिश्र दुहेरी स्पर्धांमध्ये चुरशीच्या लढती होणार आहेत.

 

याव्यतिरिक्त, 40, 45 आणि 50 वर्षांवरील पुरुष दुहेरी, 35 आणि 40 वर्षांवरील महिला दुहेरी आणि 40 वर्षांवरील मिश्र दुहेरी अशा सीनियर गटातील स्पर्धेचे आयोजनदेखील करण्यात आले आहे. या स्पर्धेतील विविध गट आणि स्पर्धा खेळाडूंना एकाच छताखाली आपले कौशल्य दाखवण्याची संधी देणार आहेत.

 

महाराष्ट्राच्या बॅडमिंटन खेळाडूंना एक मोठ्या मंचावर आपल्या कौशल्यांचे प्रदर्शन करण्याची सुवर्ण संधी या स्पर्धेने दिली आहे.

 

स्पर्धेची तयारी जोरदार चालू असून, राज्यभरातील अनेक प्रमुख खेळाडू या स्पर्धेसाठी सज्ज आहेत. 14 नोव्हेंबरपासून सुरू होणारी ही स्पर्धा बॅडमिंटन प्रेमींना आणि खेळाडूंना एक अनोखा अनुभव देईल, यात शंका नाही!